په ۲۰۰۱ کال کې ناټو او امریکا پر افغانستان یرغل وکړ؛ په زرګونه افغانان یې ووژل، هېواد یې ښکېلاک کړ او غربي ناوړه ارزښتونه یې پر افغانانو وتپل. امریکایانو د یرغل پر مهال له هوا بمونه ویشتل او پر ځمکه یې زیاتره پخوانيو مجاهدینو مرسته کوله او د خپلو افغانانو پر وړاندې یې د امریکایانو په ګټه جګړه کوله. په داسې حال کې چې یو وخت یې د کمونیستي نظام او شورویانو پر وړاندې په اسلامي انګېزه د اسلام د حاکمیت لپاره جګړه کوله. پخوانیو مجاهدینو د ټولو اسلامي ارزښتونو خلاف د امریکا او د امریکايي دولت مرسته او ملاتړ وکړ. مګر په پایله کې کله چې امریکایانو په افغانستان کې د خپلې خوښې دولت ټينګ کړ؛ مجاهدین په یې ناوړه  نومونو یادول، د فساد دوسیې یې ورته جوړې کړې او بلاخره په خورا ناوړه بګرونډ سره یې له حکومت څخه یو پر بل پسې وشړل.
اوس چې د امریکایانو تر نسبي وتلو وروسته د ښکېلاک او غربي ارزښتونو یو ګوډ او مات سمبول (د اشرف غني پر مشرۍحکومت) پاتې دی او د دوام هېڅ هیله یې هم نشته؛ پخواني مجاهدینو له تېر عبرت نه دی اخیستی او له خپلو تېرو تېروتنو یې توبه نه ده ایستلې، یو ځل بیا د خپلو مسلمانانو وروڼو پر وړاندې په ښارونو کې د جګړې ډګر ته را دانګلي دي.
پوښتنه دا ده چې دغه پخواني مجاهدین د کوم ارزښت، د چا لپاره او د چا پر وړاندې جګړه کوي؟ ایا د ډیموکراسۍ او جمهوریت لپاره جګړه کوي، په داسې حال کې دوی د اسلام د حاکمیت لپاره راپورته شوي وو. ایا دوی د امریکا د حاکمیت او تکنوکراتانو د حکومت د دوام  او بقا لپاره جګړه کوي، په داسې حال کې د دوی په شل کلن حاکمیت کې له فساد پرته بل څه نه وو. ایا دوی د خپلو هغو مسلمانانو وروڼو پر وړاندې جګړه کوي چې دوی په تشو لاسونو تېر شل کاله د ناټو او امریکایي سرتېرو چې تر غاښونو پورې په سختو وسلو سنبال وو جهاد کاوه.
غوره دا وه چې پخوانیو مجاهدینو د جګړې پر ځای چې کېدی شي د زرګونو انسانانو د مرګ ژوبلې لامل شي، له مقابل لوري سره د تفاهم او الهي شریعت معیار ګرځولو لاره غوره کړې وی او په دې سره یې د یوې لویې فتنې مخه نیولی وئ.